தரையினில் தவழும் நிலவோ

சுல்தான் அஹமது நளீர்

தரையினில் தவழும் நிலவோ – நீ

மடியினில் மின்னும் கதிரோ

தமிழினில் சேர்ந்த சுவையோ- நீ

கவியினில் மிளிரும் அழகோ

இல்லம் வந்த இசையோ – நீ

இதயம் ஈர்க்கும் விசையோ

இலக்கணம் பாடும் அசையோ – நீ

இலக்கியம் தேடும் ஓசையோ

இதந்தரும் இயற்கையின் சிரிப்போ – நீ

நிதம்வரும் நினைவினின் களிப்போ

விடியற் காலையின் கிழக்கோ – நீ

விடியல் நல்கிடும் இலக்கோ

மழைக்கால வானத்து வில்லோ – நீ

மனங்கவர் மணிவைரக் கல்லோ

தெய்வீக நாதக் குழலோ – நீ

தெவிட்டாத தெனின்பக் குறளோ

ஆசையில் தேடிய முத்தோ – நீ

அன்பினில் விளைந்த வித்தோ

ஆண்டவன் அளித்த பரிசோ – நீ

ஆதவன் போல் வந்த முரசோ

நதியினில் ஆடிடும் வளமோ – நீ

நகர்ந்திடும் ஆனந்தக் குடமோ

நாயகன் அளித்திட்ட அருளோ – நீ

நபிநாயகம் உவந்திடும் நிறைவோ

முகம்பார்த்து சிரிக்கும் பூவே – நீ

சகம் போற்ற சிறந்து வாழ்க!

புகழோங்க வாழ்வு வாழ்க!! – நாங்கள்

பூரித்து மனம்மகிழ வாழ்க!!!

வாழ்த்துடன் ஜே.எம்.பாட்ஷா (30-10-2009)