நேற்று (28-05-2021) வட்டார இலக்கியத்தின் ‘முன்னத்தி ஏர்’, ‘தமிழ் எழுத்துலகின் பீஷ்மர்’, ‘தலைசிறந்த கதைசொல்லி’, ‘கரிசல் இலக்கியத்தின் பிதாமகர்’ என்றெல்லாம் போற்றப்படும் கி.ரா. என்கிற கி.ராஜநாராயணன் நினைவேந்தல் நிகழ்வு அமீரகத்தின் உம்முல் குவைனில் அமைந்துள்ள மாங்ரூவ்ஸ் UAQ, the Mangroves. சதுப்புநில கடற்கறையில் சிறப்பாக நடந்திருந்தது.
ஒன்றரை ஆண்டுக்கு பிறகு அமீரக எழுத்தாளர்கள் & வாசகர்கள் குழுமம் சார்பில் நடந்த கி.ரா. நிகழ்வேந்தலில் நண்பர்களை சந்தித்ததில் பெருமகிழ்வு.
நிகழ்வு சம்பிரதாய இரங்கல் கூட்டம் போல அழுது ஒழுகாமல் தொன்னுற்று ஒன்பது வயது வரை வாழ்ந்து கரிசல் இலக்கியத்தில் உச்சம் தொட்டு மறைந்த பிதாமகனை கொண்டாடித் தீர்த்த மகிழ்வான நிறைவான நிகழ்வாக அமைந்தது.
நிகழ்வில் அறிமுக உரையை Bilal Aliyar நிகழ்த்தி கி.ரா வை அறிமுகம் செய்து வைத்து பேசி அவரின் மறைவிற்கு அரசு மரியாதை வழங்கி எழுத்தாளர் சமூகத்தையே மகிமை படுத்திய முதல்வர் M. K. Stalin அவர்களுக்கும் அதற்கு முன்னெடுப்பை செய்த தொழில்துறை அமைச்சர் அண்ணன் Thangam Thenarasu அவர்களுக்கும் நன்றி தெரிவித்தார்.
நிகழ்வில் கி.ராவின் முகஸ்துதி என்ற கதையை முகஸ்துதி குறித்தும் அதன் வகைகள் குறித்தும் அது எப்படி அழிவிற்கு வழி வகுக்கும் சிங்கம், நரி, கழுதை மூலமாக அவை கி.ராவின் வட்டார மொழியிலேயே மிக சுவாரஸ்யமாக பேசி அசத்தினார் நிழற்பட நிபுணர் Subhan Peer Mohamed. பேச்செல்லாம் சிரிப்பலை.
பஸ்பயணத்தில் அதுவும் கடுகடுப்பான நடத்துநர் மற்றும் இறுக்கமான சூழல் நிலவிய பஸ்பயணத்தில் ஒரு இளம்பெண் கைக்குழந்தையோடு ஏற அந்த பஸ்ஸில் பயணம் செய்தவர்களின் மனநிலையை எப்படி உற்சாகமாக மாற்றியது எத்தனை இயல்புள்ள்வர்களை எத்தனை முகபாவங்கள் உருவங்கள் கொண்டவர்களை கிரா ஒரு சகபயணியாக இருந்து கவனித்து மிகநுண்ணிய முறையில் கதையாக படைத்துள்ளார் என்று Jazeela Banu அவர்கள் கூறிய விதம் எல்லோரையும் கவர்ந்தது
அடுத்ததாக அன்பு அண்ணாச்சி Asif Meeran புறப்பாடு என்ற தலைப்பின் கதையை சொன்னால் கூட கி.ராவின் வட்டார வழக்கின் சுவையை தவற விட்டு விடுவோமோ என்று வாசித்தார்.
கிராமத்தில் பெரும் செல்வாக்கோடு வாழ்ந்து நிறைய பேரன் பேத்திகள் எடுத்த நஞ்சை புஞ்சைகள் கிராமத்து பெருங்குடியாக வாழ்ந்த அண்ணாரப்ப கவுண்டர் என்ற பெரியவரின் மரணப்படுக்கை பற்றியது, அவர் பல மாதங்களாகவே மரணப்படுக்கையில் கிடப்பதால் ஊரிலும் குடும்பத்திலும் எந்த விஷேசகாரியங்களும் செய்யமுடியாத அவர்கள் குடும்பம் சகிதமாக கிராமமே அவரது மரணத்தை எதிர்ப்பார்த்து கடைசியில் அவரின் கதையை முடிக்க எவ்வளவு முயற்சி எடுக்கிறார்கள்.. அத்தனைக்கும் ஈடுகொடுத்து அவர் உயிர் பிரிய மறுத்து தொடரும் முயற்சிகள் பின்பு ஒருவழியாய் மரணம் நிகழ அவரை சுடுகாடு கொண்டு செல்வதுவரை அவ்வளவு நகைச்சுவையாய் கிராமத்து அசல் தத்ரூபங்கள் குறையாத கிராவின் அந்த கதை கிராமத்து கதைமாந்தர்களை கண்முன்னே நிறுத்தியது.
முத்தாய்ப்பான மூன்று சிறப்பு பேச்சாளர்களோடு நிகழ்வு முடிந்தது. ஆசிபண்ணன் புத்தகம் அனுப்பியும் என் போன்றோர் வெட்டித்தனமாக பொழுது கழித்து படிக்காததினால் பேசவில்லை.
குழுமிய இடம் அதிகம் பேர் அறிந்திராத அழகிய சதுப்புநில கடற்கரை. நிகழ்விற்கு வந்திறங்கிய போது வடை, டீ, சமோசா, பக்கோடா தொடங்கி உட்கார சேர், விரிப்புகள், டிஸ்யூ, தண்ணீர் பாட்டில்கள் பிறகு நிலாச்சோறாக டேஸ்டி பிரியாணி, சிக்கன்65, பிரட் ஹல்வா என Balaji Baskaran Kausar Baig Bilal Aliyar, Ahamed Zayed என குழுமத்தின் அன்புள்ளங்கள் அசத்திவிட்டனர். தவிர அபுதாபியிலிருந்து Firdhous Basha நித்யா குமார் பால்கரசு போன்றோரும் துபாய் ஷார்ஜாவிலிருந்து Jazeela Banu &Family, Charu Mathi - Shroo, Sabeer Ahamed மற்றும் பல நண்பர்கள் ( மன்னிக்கவும் பெயர் தெரியவில்லை) வந்திருந்தனர்.
எழுத்தாளளின் அதிர்வலைகள் அவன் இறந்தாலும் ஓய்வதில்லை என்பதை நேற்றைய நிகழ்வு உணர்த்தியது.
29-05-2021
கருத்துகள் இல்லை:
கருத்துரையிடுக