18 ஜனவரி 2023

அன்பென்ற மழையிலே - Islamic version

1
அன்பென்ற மழையிலே
அகிலங்கள் நனையவே
அண்ணல்நபி  தோன்றினாரே..
 
உலத்தில் எல்லோர்க்கும்
உயர்க் கொடையாகவே
உம்மிநபி தோன்றினாரே
 
புகழோங்கும் இறைவனே
புகழ்ந்தேற்றும் புனிதராய்
புவிமீது தோன்றினாரே
 
நற்செய்தி பகிர்ந்திடும்
நாநிலத் தூதராய்
நாயகம் தோன்றினாரே
 
2
அன்பென்ற மழையிலே
அகிலங்கள் நனையவே
அண்ணல்நபி  தோன்றினாரே..
 
நிலம் அழிக்கும் பேதங்கள்
நிஜமாக நீங்கவே
நிறைநாதர் தோன்றினாரே
 
குலப்பெருமை பேசியோர்
கொடுஞ்செயல்கள் ஒழியவே
குணநாதர் தோன்றினாரே
 
நூற்றாண்டு காலமாய்
புதையுண்ட பெண்சிசுக்கள்
விசும்பல்களில் தோன்றினாரே..
 
அறியாமை காலத்து
அநீதங்கள் பொசுங்கிடும்
நெருப்பாக தோன்றினாரே
 
பாலைவன நிலத்திலே
பால்சுரக்கும் ஊற்றாக
பாசநபி தோன்றினாரே
 
3
அன்பென்ற மழையிலே
அகிலங்கள் நனையவே
அண்ணல்நபி  தோன்றினாரே..
 
உலத்தில் எல்லோர்க்கும்
உயர்க் கொடையாகவே
உம்மிநபி தோன்றினாரே
 
அன்பென்ற மழையிலே
அகிலங்கள் நனையவே
அண்ணல்நபி  தோன்றினாரே..
 
உலத்தில் எல்லோர்க்கும்
உயர்க் கொடையாகவே
உம்மிநபி தோன்றினாரே
 
 
- ஜா.மு
02-05-2020

14 ஜனவரி 2023

அறியாதபுரம் வெளியீடு குறித்த பதிவுகள்















- ஜா.மு

04 ஜனவரி 2023

"அறியாதபுரம்" துபாய்க்கு வந்து சேர்ந்தது

"அறியாதபுரம்" நூல் பிரதிகள் துபாய்க்கு வந்து சேர்ந்துவிட்டது, பெருமகிழ்ச்சியுடன் பெற்றுக் கொண்டேன்.



கேலக்ஸி பதிபகத்தின் வெளியீடாக வரும் இந்நூலை FJ tours & Travels மூலம் கேலக்ஸியின் பாலாஜி அண்ணன் Balaji Baskaran சுடச்சுடத் தருவித்து அளித்தார்.

நூலின் தரம் சிறப்பாக வந்துள்ளது. கையில் வாங்கும் போதே தரத்தின் நிறைவில் மனம் நிறைந்தது. இந்நூலுக்கு உழைத்த கேலக்ஸியின் ஆமினா முஹம்மத் Amina Mohammed உள்ளிட்ட அனைவருக்கும் எனது நன்றிகள்.

நூலின் பிரதிகளை கேலக்ஸி பதிப்பகத்தின் பாலாஜி அண்ணனுக்கும் எழுத்தாளரும் Proactive safety consultancy உரிமையாளருமான ஜெஸிலா பானு Jazeela Banu அவர்களுக்கும் அளித்து மகிழ்ந்தேன்.
நூல் வரும் சென்னை புத்தகக் காட்சியில் அரங்கு எண் 156&157ல் கிடைக்கும், மேலும் ஆன்லைனில் galaxybs.com Galaxybs Galaxybs
என்ற இணையதள முகவரியிலும் கிடைக்கும்.

மகிழ்ச்சி.
எல்லாப் புகழும் இறைவனுக்கே.
-ஜா.மு.

முகநூல் இணைப்பு

03 ஜனவரி 2023

நள்ளிரவில் பிறக்கும் புத்தாண்டு



எல்லா புத்தாண்டும்
நள்ளிரவில் தான் பிறக்கிறது!
இரவு என்பது
இருளின் போர்வையால்
நம்மை கதகதப்பாக்கி
ஓய்வின் கரிசனத்தால்
அணைத்துக் கொள்வது;
மனதையும் உடலையும் சாந்தப்படுத்தி
அடுத்த உழைப்பிற்கு தயார் செய்வது;
இரவு என்பது வாழ்வின் இருளல்ல
இரவின் இருள் என்பது
வாழ்வின் விளக்கிற்கு
பிரகாசத்தை ஏற்றும் ஒளியின் கரம்.
இரவிற்கு ஆயிரம் ரகசியங்கள் இருந்தாலும்
இரவிற்கும் நமக்குமான
ஆலிங்கனம் வெளிச்சம் பட்டு வெடிக்காத மென்மொட்டு.
கண்ணை மூடிக்கொண்டே
அன்பின் மையலோடு
கொஞ்சம் சூரியனை நோக்கி
பூமி சுற்றி நகர
கிழக்கு வெளுத்துவிடும்.
அதுவரை உறங்கி
நிதானமாக நாழிகை நகரட்டும்
உற்சாகமாய் கதிரோன் மலரட்டும்
புத்துணர்வு சூழ
புதிய புலர்ச்சி
இருக்க வேண்டியே
எல்லா புத்தாண்டும்
நள்ளிரவில் தான் பிறக்கிறது!
நம் ஒவ்வொருவரின்
வான் வனத்திலும்
புதிய சூரியப்பூ மலர்கவே!
- ஜா.மு
01-01-2023 12:28 am