தாலாட்டு - புன்சிரிப்பு பூமகனே

பல்லவி :

புன்சிரிப்பு பூமகனே கேளடா கண்ணே –உன்

பூர்வீகத்தை மறந்திடாது நினைந்துகொள் கண்ணே

அனுபல்லவி:

பாபம்சேரா பாலகனே தெரிந்துகொள் கண்ணே

இருந்தநிலை மறப்பதுவே பாபமாம் கண்ணே

சரணங்கள்:

சிறந்தநாமம் சூட்டியுலகு அழைத்திடும் கண்ணே - அந்த

நாமமதில் உறைந்தயொன்று நீயல்ல கண்ணே

நாமரூப பேதமில்லா உயர்பொருள் கண்ணே – நீ

நாமமதில் அடங்கிடாத மறைபொருள் கண்ணே

அனுபவிக்கும் யாவையுமே ஆய்ந்துபார் கண்ணே – அதில்

ஆன்மீக விளக்கங்கள் கிடைத்திடும் கண்ணே

தெளஹீதின் தெளிவில்நீ லயித்திடு கண்ணே – என்றும்

லெளஹீக வாழ்விலும்நீ ஜெயித்திடு கண்ணே

பார்ப்பதிலே பரமனையே பார்த்திடு கண்ணே – உன்

கேள்வியுணர்வு இவையணைத்தும் வேறல்ல கண்ணே

அகமியத்தை சுமந்தவர்கள் உயிரடா கண்ணே – உன்

உயிரைவிட உணர்வைவிட மேலடா கண்ணே

கொடும்கள்ளக் கூட்டங்களை வெறுத்திடு கண்ணே - அதை

கடும்சீற்றத் துடனேநீ எதிர்த்திடு கண்ணே

இறையின்பகைகள் விரைவிலேயே அழிந்திடும் கண்ணே -நம்

மறையின்நாதர் மாண்புகளே ஜொலித்திடும் கண்ணே

இகமதிலே பலர்அகம்மலர உழைத்திடு கண்ணே – இந்த

ஜெகமதிலே வேறுமகிழ்வு ஏதடா கண்ணே

இதயத்தூதர் இன்பநெறியில் நிலைத்திடு கண்ணே - அதில்

உதயமாகும் உண்மையில்நீ உயர்ந்திடு கண்ணே

-ஜே.எம்.பாட்ஷா 

என் மகன் சுல்தான் அஹமது நளீர்- ஐ மனதில் வைத்து வாழ்த்தாய் 2002-ல் எழுதியது, 2016ல் சங்கை நபி இசைக்கோர்வையில் வெளிவந்தது.